弟兄姊妹，主內平安！
踏入「將臨期」呢個教會年曆嘅第一個節期，讓我哋藉着聆聽詩歌、默想、祈禱一齊記念主耶穌基督嘅降生，並仰望佢再次降臨。請先安靜片刻，呼求聖靈同在。
喺頭三次嘅「默想聖詩」，我哋會聆聽「What Child Is This」呢首傳統嘅英文聖詩，並從三個向度默想主耶穌基督降臨呢個事件。今日，讓我先聽一個由詩班合唱嘅版本。
6下馬利亞的產期到了，
7 就生下了頭胎兒子。她用布把他裹着，放在馬槽裏，因為旅店沒有地方給他們。
8 當時，有些牧人在附近露宿，夜間看守羊羣。
9 有主的一位天使向他們顯現，主的榮光四面照耀他們，他們大為驚恐。
10 天使對他們說：「不要怕！看啊，因為我報給你們一個大喜訊，是給萬民的：
11 今天，在大衞的城裏，為你們誕生了一位救主，就是主基督。
12 你們將會找到一個嬰孩，包着布，躺在馬槽裏，那就是給你們的標記。」
13 突然有一大隊天軍出現，與那位天使一起讚美神，說：
14 「在至高之處榮耀歸於神！ 在地上平安臨到他所喜愛的人！」
〈路加福音〉對耶穌降生嘅敍述充滿咗強烈嘅反差同張力：
- 耶穌基督既然係神嘅兒子，出世嘅時候榮光四射，但係點解會喺卑微嘅馬槽出生？
- 神差遣天使嚟宣佈關乎萬民嘅大喜信息，點解唔係首先向君王或者祭司呢啲政治同宗教領袖報訊，反而向被社會輕視、遺棄，迫不得已喺夜間牧羊維生嘅人顯現？
神用咗令人驚訝同震撼嘅方式進入世界，我哋對耶穌降生仲有冇呢份驚訝同震撼呢？耶穌基督嘅降生對我哋嘅人生有咩影響，我哋應該點樣回應神呢個咁特殊嘅舉動？我哋都一邊聆聽詩歌，一邊思想下。
我哋一齊祈禱：
慈愛嘅天父，感謝祢藉着主耶穌基督嘅降生賜予我哋真正嘅生命。不過，我哋身處香港呢個繁囂都市，每日努力為學業、工作、家庭忙碌打拼，難免忽略咗呢件咁震撼、咁重要嘅事。天父啊，求祢幫助我哋喺呢個將臨期再次將焦點放喺主耶穌身上，透過認識主耶穌而認識天父祢嘅旨意同埋教導。
親愛嘅主耶穌，感謝祢為拯救我哋而親臨世間，不惜喺卑微嘅馬槽謙卑誕生。願祢嘅大愛再次感動我哋、再次震撼我哋，以致我哋明白到惟有喺祢裏面先至有真正嘅平安、喜樂、同埋生命！
內住人心嘅聖靈，求祢時刻提醒同引導我哋，仰望主耶穌，認識並且實踐主嘅教導，扭轉我哋為生活而營營役役嘅生命，轉化我哋成為幫助貧窮、輔助軟弱、安慰傷心嘅福音使者，在世上為祢作見證！ 願榮耀歸於聖父、聖子、聖靈。阿們。