弟兄姊妹，聖誕快樂！
今日係聖誕節，係一個我哋好應該花一啲時間默想主耶穌基督降生嘅日子。請先安靜落嚟，默默呼求聖靈同在，幫助我哋親近神。
我哋一齊聽一首節拍強勁，信息好簡單嘅詩歌：Born Is The King。
歌詞：
Verse 1
Born unto us this day a Savior
Gifted from heaven to a manger
The hope of the world alive
For all mankind
All of the earth rejoice
Chorus
So lift up your voice
and sing out His praise
It’s Christmas
Born is the King
Rejoice in the day
It’s Christmas
Make a joyful sound
It’s Christmas
Let His praise resound
Verse 2
Goodwill to all the earth
And peace divine
All of the earth rejoice
It’s Christmas time
It’s Christmas time
第一節
今日一位救主為我們誕生
從天賜予降生於馬槽
世界活潑的盼望
為了全人類
全地歡喜快樂
副歌
所以放開你的聲音
唱出祂當得的讚美
這是聖誕時節
君王誕生了
在這一天歡喜快樂
這是聖誕時節
發出歡樂的聲音
這是聖誕時節
讓祂的讚美迴盪
第二節
對全地的美善祝願
以及神聖的和平
全地歡喜快樂
這是聖誕時節
這是聖誕時節
剛才所聽嘅詩歌不斷重複住一個信息：「It’s Christmas time.（這是聖誕時節。）」咁到底聖誕時節對我哋一班基督徒嚟講，應該係一段點樣嘅時間呢？根據教會年曆，「聖誕期」（Christmastide）一共有12日，由「聖誕節」（Christmas）展開，一直到翌年1月6日嘅「主顯節」（Epiphany）前一夜結束，所以1月5日又有一個名稱叫「第十二夜」（Twelfth Night）。可能你會覺得個名似曾相識，因為大文豪莎士比亞（William Shakespeare，1564～1616）寫咗一齣喜劇，個劇名就係叫做《第十二夜》！聖誕期係一段畀信徒進深默想基督降生嘅時期，而喺聖誕期嘅第一日，即係聖誕節，默想嘅內容順理成章就係基督降生。
詩歌的另一個重要信息，亦都成為咗個歌名，就係「Born is the King. （君王誕生了！）」以下落嚟，我哋就默想下呢個信息。
請聆聽一段經文：〈馬太福音〉第二章1～2節：
「1在希律作王的時候，耶穌生在猶太的伯利恆。有幾個博學之士從東方來到耶路撒冷，說：2『那生下來作猶太人之王的在哪裏？我們在東方看見他的星，特來拜他。』」
〈馬太福音〉嘅作者用呢個故事，巧妙地帶出主耶穌基督與別不同嘅身分：佢係最尊貴嘅君主，但同時係最卑微嘅小人物。前者，當年係佢嘅生命本質；後者，就係佢在人間嘅身世。東方博士係世俗人嘅代表。佢哋看似係有識之士，所以先知道新王誕生呢件大事。但佢哋亦只能夠按世俗嘅知識同眼光試圖尋找佢，於是就走去稱為「大君王的京城」嘅耶路撒冷打聽，結果當然係唔會搵到。
聖誕期裏面，我哋第一個要思想嘅問題就係：生活喺消費主義嘅社會，我哋知唔知道要尋找「那生下來作猶太人之王的」呢？
東方博士從老遠走嚟搵新生王係有目的嘅。佢哋話：「我們在東方看見他的星，特來拜他。」敬拜、俯伏下拜，係人民喺君王面前要行嘅大禮，反映出地位嘅尊卑，而呢個外在嘅行動，理應有內在謙卑嘅心予以配合。喺現代社會，我哋缺少向王下拜嘅生活經驗，甚至我哋覺得應該人人平等，對世上有啲人出身比其他人尊貴感到抗拒。
第二個我哋喺聖誕期應該思想嘅問題係：我哋真係認同主耶穌基督配得我哋嘅俯伏下拜嗎？喺現實生活中，我哋又要點樣向主獻上我哋嘅敬拜呢？
呢個聖誕故事我哋好熟，知道東方博士嘅行動後來驚動咗大希律（公元前72～4）。我哋喺聖誕節必須要履行嘅使命就係：以主耶穌基督降生嘅信息「驚動」我哋周圍嘅人！用一首歌嘅時間，諗下你有咩應該做吖。
我哋一齊祈禱：
慈悲嘅天父，今日係聖誕節，願祢從世人得到最大嘅讚美，因為祢將祢獨一嘅兒子賜畀世人，為世人完成奇妙嘅救恩！
親愛嘅主耶穌，感謝祢親臨人間，成為大世界裏面一個卑微嘅小人物，與世人認同，祢嘅同在對我哋充滿意義！
內住人心嘅聖靈，請加力畀我哋履行基督徒嘅本分，向神獻上敬拜、實踐聖經嘅教導，向人獻出關懷，幫助人認識神！
願榮耀歸於聖父、聖子、聖靈。阿們。