弟兄姊妹，主內平安！
踏入「將臨期」呢個教會年曆嘅第一個節期，讓我哋藉着聆聽詩歌、默想、祈禱一齊記念主耶穌基督嘅降生，並仰望佢再次降臨。請先安靜片刻，呼求聖靈同在。
喺頭三次嘅「默想聖詩」，我哋會聆聽「What Child Is This」呢首傳統嘅英文聖詩，並從三個向度默想主耶穌基督降臨呢個事件。今次我哋聽一個嶄新演繹嘅她特別版，呢個版本係為咗「The Chosen」呢套福音連續劇而寫，比起傳統嘅版本多咗一節正歌同副歌，旋律亦都多咗一啲變化，保證帶俾你煥然一新嘅感覺！
Verse 1
What Child is this
Who laid to rest
On Mary’s lap is sleeping?
Whom Angels greet with anthems sweet,
While shepherds watch are keeping?
Chorus
This, this is Christ the King,
Whom shepherds guard and Angels sing
Haste, haste, to bring Him laud,
The Babe, The Son, Of Mary.
Verse 2
Why lies he in such mean estate
where ox and ass are feeding?
Good Christian fear: for sinners here
the silent Word is pleading.
Verse 3
So bring Him incense, gold and myrrh,
Come Peasant, King, to own Him
The King of Kings salvation brings,
Let loving hearts enthrone Him.
第一節
是何等嬰孩 安睡在 馬利亞的懷裏？ 天使以歌聲恭迎祂， 牧羊人也為祂守夜。
副歌
這位、這位就是基督君王， 牧羊人守望祂，天使歌頌祂。
快來、快來，來讚美祂， 這嬰孩，是馬利亞的兒子。
第二節
為何祂躺在這樣卑微之處， 竟睡在牛驢餵食的地方？
信徒當敬畏：為了罪人的緣故， 聖道正在默默代求。
第三節
獻上乳香、黃金與沒藥， 無論庶民或君王都來承認祂。
萬王之王帶來救恩， 讓敬愛的心成為祂的寶座。
呢個版本為福音連續劇「The Chosen」而寫，多咗講述耶穌釘十架嘅副歌二，同埋呼應第三節正歌嘅副歌三，今次我哋集中睇第三節歌詞嘅內容，就係人對呢個奇妙嬰孩誕生嘅回應。
我哋每年都過聖誕，或者都已經淡忘咗聖誕嘅意義，甚至向來都冇乜點諗過……如果你認真諗下，創造天地嘅神差遣佢兒子嚟到世上，佢真係嚟咗喇，你會有咩相應嘅行動？
詩歌第三節正歌嘅信息係大家都熟悉嘅東方博士向新誕生嘅君王獻禮。當時被羅馬皇帝冊封為「猶太人的王」嘅希律，聽到有新王誕生嘅傳聞就驚自己王位不保，於是派幾個東方博士去尋訪耶穌，意圖殺死耶穌鞏固自己嘅王位。幾個博士真係搵到耶穌，仲真誠咁獻上禮物，並拜佢為王。
請聆聽一段經文：〈馬太福音〉第二章10～11節：
10 他們看見這顆星，真是喜樂極了。
11 他們走進屋裏，看見那孩子跟他母親馬利亞在一起，就俯伏拜他，又打開他們的寶盒，把黃金、乳香和沒藥這些禮物獻給他。
博士送嘅三樣禮物——黃金、乳香、同埋沒藥，其實隱含豐富象徵意義。
黃金係獻俾君王嘅貢物，送黃金俾耶穌即係肯定佢嘅君王嘅身份；
乳香通常喺聖殿敬拜嘅時候用，送乳香俾耶穌即係肯定佢大祭司嘅身份；
沒藥通常係喺葬禮用嚟膏抹死人嘅遺體。送沒藥俾出世冇耐嘅耶穌其實唔合常理。但係呢個行徑正正就係寓意耶穌嘅降生就係為咗救贖世人而犧牲自己性命。
呢個奇妙嬰孩——耶穌基督，係治理百姓嘅君王、係溝通天地嘅祭司、同埋除去罪孽嘅羔羊，佢已經嚟咗世上。你打算點樣回應？
- 你是否願意將生命主權交畀佢，讓佢作你生命嘅王？
- 你是否願意奉佢嘅名祈禱，透過佢認識神？
- 你是否願意靠着佢嘅救贖大能，與罪抗衡，擇善而行？
我哋一邊聆聽詩歌，一邊思想下我哋應該點樣回應耶穌基督嘅降生。
我哋一齊祈禱：
慈愛嘅天父，感謝祢藉着主耶穌基督嘅降生賜予我哋真正嘅生命。不過，我哋身處香港呢個繁囂都市，每日努力為學業、工作、家庭忙碌打拼，難免忽略咗呢件咁震撼、咁重要嘅事。天父啊，求祢幫助我哋喺呢個將臨期再次將焦點放喺主耶穌身上，透過認識主耶穌而認識天父祢嘅旨意同埋教導。
親愛嘅主耶穌，感謝祢為拯救我哋而親臨世間，不惜喺卑微嘅馬槽謙卑誕生。願祢嘅大愛再次感動我哋、再次震撼我哋，以致我哋明白到惟有喺祢裏面先至有真正嘅平安、喜樂、同埋生命！
內住人心嘅聖靈，求祢時刻提醒同引導我哋，仰望主耶穌，認識並且實踐主嘅教導，扭轉我哋為生活而營營役役嘅生命，轉化我哋成為幫助貧窮、輔助軟弱、安慰傷心嘅福音使者，在世上為祢作見證！
願榮耀歸於聖父、聖子、聖靈。阿們。